В сабота во Центарот за култура „Григор Прличев“ Фестивалот ќе биде отворен со „Клуб Бус Паладиум“ во режија на Кристофер Томсон, а фестивалот ќе биде затворен со „Врапчето ми кажа“ на режисерот Паскал Тома, кој годинава е добитник на „Златна маска“ за животно дело и ќе биде почесен гостин на фестивалот.

Најавено е присуството на актерите Изабел Паско, Лио, Артур Дипон, режисерите Ан Ле Ни, Натан Милер, Жером Бонел и Симон Лелуш (син на Клод Лелуш). На  „Езерските средби“ тие ќе се сретнат со македонски продуценти, што ќе биде можност за македонско-француски партнерства и копродукции. За  отворањето на фестивалот во Охрид ќе допатува и Ален Туре, потпретседател на регионот Долна Нормандија, кој пред два месеца беше домаќин на фестивалот „Балканска пролет“ - годинава посветен на Македонија.

- Ова трето издание на Фестивалот на францускиот филм е од особено значење за македонската кинематогафија и е можност да се постават цврсти темели за идна соработка меѓу францускиот и  македонскот филм, да се отвораат можности за размена на уметници, продуценти, режисери, размена на искуства со земја која претставува лидер во европската кинематографија - рече министерката за култура Елизабета Канческа-Милевска на прес-конференцијата по повод фестивалот.

Ивршниот директор на фестивалот Зоран Велјановски очекува голем интерес и за ова издание. Тој информираше дека лани имало меѓу 7.000 и 9.000 посетители  и оти за секоја проекција имало над 90 отсто исполнетост на киносалата во Центарот „Григор Прличев“ која има 630 места.