На седницата присуствуваа членовите на Советот за култура, како  и в.д. директорот на „Вардар филм“ Румен Ќамилов, директорот на Филмскиот фонд Дарко Башевски и директорката на Кинотеката на Македонија,  Мими Ѓорговска-Илиевска. Актуелната состојба во „Вардар филм“ беше согледана од сите аспекти. Членовите на Советот за култура истакнаа дека е потребно да се поддржи опстојувањето на оваа национална установа која долги години ја претставуваше македонската кинематографија на филмските фестивалски сцени низ целиот свет. Тие се согласија дека „Вардар филм“ и понатаму треба да дејствува како национална институција, која би се трансформирала во „филмска техничка база“. Исто така, беше подвлечено дека треба дополнително да се утврдат моделот и условите за работа на институцијата.

Министерството за култура ќе ја информира Владата на Република Македонија за согледувањата на Советот за култура во врска со состојбата во „Вардар филм“ со предлог-мерки за санирање и натамошно опстојување како „филмска техничка база“. Предлог-мерките ќе значат спроведување на  комплетна финансиска ревизија, стручна експертиза од надворешни соработници за реалната состојба на ресурсите со кои располага  институцијата, а Министерството за  култура да разработи  план, динамика и модел на трансформација на „Вардар филм“ и да ги спроведе насоките. 

Седницата на Советот за култура е продолжение на претходната, одржана на крајот од минатиот месец, а на која беа анализирани актуелната состојба и стратегиските насоки за идниот развој на аудиовизуелната / кинематографската дејност во Република Македонија.