Денеска во 11 часот во просториите на ЕУ - Инфоцентарот, во организација на Културно-контактната точка при Министерството за култура, се одржа Инфоден посветен на програмите на Заедницата: „Култура 2007-2013“ и „Европа за граѓаните“. На Инфоденот беше промовирана и брошурата  „Програма Култура на ЕУ - Примери на добра пракса“,  подготвена од одделението Културно-контактна точка, во издание на Министерството за култура и поддржана од Извршната агенција за образование, аудиовизуелна дејност и култура при Европската комисија. На настанот, свои обраќања пред присутните имаа заменик- министерот за култура на Република Македонија, г. Драган Недељковиќ, и Неговата екселенција г. Хозе Мануел Паз и Агуерас, вонреден и овластен амбасадор на Кралството Шпанија во Република Македонија.

Заменик-министерот за култура Драган Недељковиќ во обраќањето пред присутните истакна дека Министерството за култура и Културно-контактната точка ја продолжуваат традицијата на промоција на програмата „Култура“ на национално ниво што ја почнаа во 2007-2008 година по потпишувањето на Меморандумот за разбирање за учество на Македонија во таа програма на ЕУ.

Културната разновидност, интердисциплинарниот пристап во остварувањето на културата и анализите кои се повеќе го потврдуваат економското значење на културата, полека, но сигурно ја лоцираат културата во центарот на општественото живеење - рече Недељковиќ.

Настанот се реализира во соработка со г. Аугусто Парамио, раководител на Културно-контактната точка за програмата „Култура“ на ЕУ и воедно раководител на Национално-контактната точка за програмата „Европа“ за граѓаните на Кралството Шпанија.