Министерката за култура оствари работна средба со Неговото Кралско Височество Принцот Мајкл од Кент

Понеделник, 30 Јануари 2012 09:08

Меѓу темите на разговор беа и можностите за унапредување на културниот туризам и промоција на Република Македонија како земја со богато културно и природно наследство

Министерот за култура Елизабета Канческа-Милевска синоќа во хотелот „Радика“ во Маврово оствари работна средба со Неговото Кралско Височество Принцот Мајкл од Кент. На средбата, на која меѓу присутните беа и амбасадорот на Обединетото кралство на Велика Британија и Северна Ирска во Република Македонија, Кристофер Ивон, членови на британската бизнис делегација, претставници на Агенцијата за поддршка и промоција на туризмот на Република Македонија, Канческа-Милевска истакна дека оваа посета е од огромно значење за бизнис секторот, но се разбира и за поголемата поддршка за унапредување на културните врски помеѓу двете земји.

Меѓу темите на разговор беа и можностите за унапредување на културниот туризам и промоција на Република Македонија како земја со богато културно и природно наследство, но и поголемата промоција на македонската култура пред британската јавност. Канческа–Милевска го информираше Неговото Кралско Височество дека на културната олимпијада во Лондон, која ќе се случи како антиципација на Летните олимписки игри, македонската култура ќе биде претставена преку неколку интересни содржини.