Осма акција „Ден на дрвото“

Четврток, 24 Ноември 2011 16:52

Министерката за култура Елизабета Канческа-Милевска вчера, во рамките на  есенската акција „Ден на дрвото - засади ја својата иднина!”, заедно со градоначалникот на општина Кавадарци Александар Панов, претседателот на Советот Илија Тренчев и пратеничката Весна Пемова, посади дрвце во близина на депонијата „Мелци”. 

Градоначалникот Панов претходно имаше кратка средба со министерката на која ја запозна со потенцијалите на општината, како и со моментната состојба во културата и во културните институции во општината. За време на престојот во Кавадарци, Канческа-Милевска, заедно со својот домаќин, го посети градилиштето на новата соборна црква „Св. Петка“ која се гради со донации на граѓаните, кавадаречкиот бизнис-сектор, пред сѐ, „Фени индустри” и „Кожувчанка”, како и со помош на општината која ѝ го отстапи градежното земјиште на МПЦ. Министерката го посети и Домот на културата „Иван Мазов-Климе” каде што беше запознаена со подготовките на малата сала со капацитет од 150 седишта во која се инсталира опрема за прикажување на филмови во 3Д-технологија по пат на јавно приватно партнерство, а исто така и со работите на монтирањето на грејните тела за затоплување на големата и на малата сала.